A oitava edición do Festival de Jazz e Blues de Ribadeo será inaugurada mañá, venres 25, ás 20:30 horas na oficina de turismo ribadense. Será nun acto no que se vai levar a cabo tamén a apertura dunha exposición retrospectiva sobre as anteriores edicións do evento. Cando se cumpre o décimo aniversario do primeiro Festival de Jazz e Blues de Ribadeo esta mostra recolle carteis, recortes de prensa e fotografías das edicións anteriores. Os carteis foron deseñados por Roberto Rodríguez Martínez e as fotos son dos ribadenses David Molejón, Elfarero, Miguel Ángel Díaz (falecido en 2020), José Antonio Lombardero e Mario Orosa, ademais de A Caixa Escura, de Burela. A exposición estará aberta ao público ata o 11 de decembro.
A continuación da inauguración terá lugar no restaurante Javier Montero a primeira cea concerto, na que actuará Pablo Sanmamed Trío. O festival continuará o domingo 27 ás 16:00 horas nas instalacións da Escola Municipal de Música e Danza de Ribadeo, onde impartirá un taller de canto Noa Lur, que ademais ás 18:30 horas ofrecerá un concerto dirixido para nenos e nenas no auditorio Hernán Naval.
O seguinte concerto será o 2 de decembro, venres, no auditorio Hernán Naval ás 20:30 horas a cargo da orquestra de jazz que crearon Pablo Castanho e Marcos Pin en Compostela no ano 2017 e da que forman parte outros 15 músicos.
O sábado 3 de decembro haberá dúas actividades gastronómicas: ás 19:30 horas un showcooking a cargo do cociñeiro, comunicador e divulgador Lucas Requejo, que preparará pratos elaborados con alimentos da provincia de Lugo e ofrecerá unha degustación nunha carpa instalada no parque de San Francisco, dentro da iniciativa denominada Jazztronomía, con acceso gratuíto.
Ás 21:30 horas terá lugar unha cea concerto no restaurante El Oviedo, na que actuará a cantante Carmen Rey, que estudou no Conservatorio Superior da Coruña, onde se formou en piano, harmonía, violín e técnica vocal. A seguinte actividade do festival será o domingo 4 ás 12:30 horas na carpa instalada no parque de San Francisco. Como segunda parte da iniciativa Jazztronomía Lucas Requejo ofrecerá unha experiencia gastronómica de preparación de bebidas denominada Beberaxes Blues.
O martes 6 chegará o concerto de Los Deltonos no auditorio municipal ás 20:00 horas. Los Deltonos é un grupo cántabro formado en 1986 que comezou sendo un trío, con Hendrik Röver como único guitarrista, ademais de baixo e batería.
A seguinte actuación programada será o xoves 8, tamén no auditorio Hernán Naval, ás 20:00 horas. Correrá a cargo dos cubanos Trío Mejunje, que está formado por tres dos músicos máis importantes de Santa Clara: A. Bringez, M. Olivera e Reinier El Negrón. .
O venres 9 ás 20:30 horas no auditorio municipal actuarán os estadounidenses Gisele Jackson & de The Shu Shu´s. Este concerto é o único en España da xira europea na que están actualmente.
E o festival rematará o domingo 11 co concerto dos franceses Red Beans & Pepper Sauce. Será no auditorio Hernán Naval ás 20:00 horas. Red Beans & Pepper Sauce fundouse en 2010 ao redor da cantante Jessyka Aké no sur de Francia. As entradas das actuacións están á venda na web gameroverpro.es, onde tamén se pode mercar un abono para cinco concertos.
