Javier Jorge Castiñeira, actual portavoz popular en Foz e na Deputación de Lugo, será de novo candidato da formación que dirixe Alfonso Rueda á Alcaldía da súa localidade en maio de 2023.

Así se trasladou no transcurso da homenaxe rendida ao exconcelleiro Pedro Fernández Manín, xa falecido, no que participaron, entre outros a secretaria xeral do PPdeG, Paula Prado; e a líder provincial da formación, Elena Candia, así como o coordinador xeral dos populares lucenses, José Manuel Balseiro.

Castiñeira proclamou que concorrerá á cita coas urnas do próximo ano con “a mesma ilusión ou máis que a primeira vez”, ademais de ratificar que dá o paso con “a mesma convicción ou máis” de que “o mellor equipo e o máis preparado” será o que presentará o PP.

Paula Prado puxo en valor que Javier Castiñeira e o seu equipo herdaron en 2011 un concello “arruinado por un goberno socialista” e foron capaces de deixalo en 2019 como “un municipio con futuro e con proxectos que melloraron a calidade de vida dos veciños”.

Por iso, animou á agrupación local a traballar para que o próximo 28 de maio “Foz volva tinguirse de azul e siga na senda da que nunca tivo que desviarse”. “Necesitamos unha maioría absoluta para poder gobernar e sabemos que podemos conseguila porque somos maioría fronte ás políticas socialistas e nacionalistas que en nada benefician nin a España, nin a Galicia, nin a Foz”, resolveu.

HOMENAXE

Do mesmo xeito, Prado sumouse “a título persoal e en nome de todo o PPdeG” á homenaxe a Pedro Fernández Manín, destacando a súa capacidade de diálogo e a súa preocupación por resolver os problemas dos seus veciños como “valores que dignifican a política” e que constitúen “un exemplo a seguir”.

Na mesma liña pronunciouse Candia, quen puxo en valor a xestión efectuada por Javier Castiñeira e os seus compañeiros, co foco en Pedro Fernández Manín, durante o oito anos que gobernaron Foz.