O Consello de Ministros acordou este martes a declaración de emerxencia das obras de adecuación das instalacións de distribución eléctrica para o equipamento de sinalización e servizos no tramo Lindín-Carreira da A-8.
Con esta actuación, segundo recolle a referencia do Consello de Ministros, o Ministerio de Transportes quere “emendar o perigo existente” neste tramo da provincia de Lugo. As obras teñen un importe de 1.223.152,46 euros.
O tramo da autovía A-8 entre Lindín e Carreira foi inaugurado en 2014 e completaron, xunto co tramo Mondoñedo-Lindín, os 87 quilómetros que restaban para completar a parte galega da autovía do Cantábrico.
Ademais, o Consello tamén acordou este martes a ampliación da declaración de emerxencia para as obras de substitución dos pretiles da primeira calzada nos viadutos de Ribón e Cadavedo, nesta mesma autovía, pero no termo municipal de Valdés (Asturias), por importe de 322.201,95 euros.
