O realizador de Burela Adrián Canoura competirá no Festival de Cans coa súa premiada curtametraxe ‘Caerán lóstregos do ceo’.

A cinta, a terceira do director mariñao despois de ‘O porco e o seu espírito‘ e ‘Salitre nas veas‘, foi elixida canda outras oito pezas audiovisuais para sección FuraCans, de non ficción. A organización do certame destaca da obra que se sitúa “entre a natureza e a mística”.

DO 22 AO 25 DESTE MES

O Festival de Cans celebrarase do 22 ao 25 de maio na parroquia do mesmo nome, situada no concello do Porriño.

ENTRE O MELLOR DO 2018

A distinción é unha mostra de apoio máis á obra de Canoura, premiada no festival Filmadrid e recoñecida pola crítica francesa Nicole Brenez como unha das mellores cintas do pasado ano.