A aposta do PSdeG-PSOE polo inxeñeiro de camiños de 35 anos Fran Cajoto resultou gañadora e o partido socialista foi a lista máis votada nas eleccións municipais de Foz.

A formación socialista obtén sete representantes na corporación municipal –partía con tres– despois de acadar 2.304 votos (890 máis ca no 2015), o 38,94% do escrutinio.

O Partido Popular (PP), cuxa candidatura encabezou o rexedor Javier Castiñeira, perde o mando do Concello despois de obter o respaldo de 1.922 focegos, 211 sufraxios menos ca nos anteriores comicios. Deste xeito, os conservadores perden as eleccións malia conseguir un edil máis, dado que o municipio contará neste 2019 con catro representantes máis (17) na corporación dos que tiña ata agora.

O BNG de Francisco Javier Fanego perde apoios -pasa de 977 a 931-, pero en cambio gaña un concelleiro, co que suma tres e pode ser chave para formar goberno.

FPF

O partido que padeceu un maior retroceso no respaldo popular foi Foz Plataforma de Futuro (FPF). O partido independente, encabezado por Luis Alfonso Sixto Legaspi e formado a partir dunha escisión do PSOE, entrou con forza na política municipal con tres concelleiros en 2015. Desta volta quita un, logo de perder case a metade dos votos colleitados daquela; tiña 1.090 e pasa a 547. Semella que a candidatura de Cajoto foi capaz de recuperar para os socialistas a confianza de moitos dos que votaron a FPF en 2015.

CXG

Por último, Compromiso por Galicia (CxG), con Damián Sánchez como líder da candidatura, obtivo 156 sufraxios, insuficientes para acadar un concelleiro.