A Federación de Comercio A Mariña (FCAM) proxecta impartir un curso de socorrismo en espazos acuáticos naturais. O colectivo de empresarios solicitou á Consellería de Economía unha axuda de 250.000 euros para poñer en marcha un Programa Integrado de Emprego (PIE) que incluiría esta formación específica, ademais doutras formacións.
A entidade -que reúne asociacións empresarias de Foz, Ribadeo, Burela, Xove, Viveiro, Covas, O Vicedo e Lourenzá– pretende contribuír a “solucionar a carencia de vilantes na comarca” que, consideran, “un problema” para o sector turístico.
FORMACIÓN DE 420 HORAS
“Os Concellos nos últimos anos están a ter moitas dificultades para atopar profesionais que traballen durante o verán no nosos areais. E pensamos que é preciso buscar solucións para que este feito non volva a producirse. A imaxe que se está a ofrecer non é a que precisamos“, expoñen os comerciantes.
Así, unha das prioridades do PIE solicitado é o curso con certificado de profesionalidade para socorristas, que terá unha duración de 420 horas (340 teórica e 80 de prácticas profesionais non laborais).
FORMACIÓN EN COMERCIO E HOSTALERÍA
Ademais, impartiríase formación en atención básica ao cliente (50 horas teóricas e 40 prácticas) e operacións básicas de restaurante e bar (120 horas teóricas e 80 prácticas).
O programa ofrecería formación a 100 persoas, coa previsión de inserción laboral para un 35%, segundo especifica a memoria do proxecto, que recolle o respaldo das 900 asociadas e asociados da FCAM.
