Seis chefs e un panadeiro integran a Asociación de Cociñeiros da Mariña, que se presentou este martes en Mondoñedo. O colectivo, sen ánimo de lucro, ten o obxectivo de promocionar e difundir a cultura gastronómica da bisbarra, cunha aposta polo produto local e polo consumo de auga Km 0.
David Rodríguez Moledo, do restaurante A Mirandilla de Rinlo; Bruno Perna Arnaú, responsable de A horta da Paula, en Mondoñedo; Jesús Villarino Gavín, do Asador, en Barreiros; Jorge López, do Pazo de Tovar, no municipio de Lourenzá; Michel Cociña, de Casa Miranda, en Burela; Alejandro Arca Uría, do Arume Gastrobar de Viveiro; e
Waldo Jose González Redondo, da Panadería Rubal, en Mondoñedo, son os membros da agrupación de cociñeiros mariñá.
O colectivo contará co patrocinio do goberno local mindoniense, que cederá locais sociais para as súas xuntanzas. Os chefs lucirán nos seus uniformes o distintivo dos produtos Horta de Mondoñedo, que darán a coñecer co seu traballo.
A alcaldesa mindoniense, a popular Elena Candia, sinalou que “a través deste proxecto, o municipio pon en valor o seu pan, a súa horta e a súa auga, e o que é máis importante, o factor humano, mozos profesionais que co seu traballo sacan adiante o mellor resultado”.
