A Consellería de Economía, Emprego e Industria, en colaboración coa Escola de Organización Industrial (EOI), puxo en marcha o pasado xoves a nova edición do coworking da Mariña Lucense, situado en Mondoñedo, no que participan os promotores de 19 proxectos empresariais que recibirán formación, asesoramento e titoría durante os próximos cinco meses para desenvolver as súas iniciativas.

As actividades dos 22 emprendedores -14 mulleres e 8 homes- que participan na aceleradora mindoniense centraranse nas novas tecnoloxías, o benestar ou a alimentación. Así, desenvolveranse iniciativas en torno ao márketing, o deseño gráfico e de mobles, a impresión, o turismo rural, unha plataforma de reservas, o agroalimentario (especias, fabas e conservas vexetais) e o comercio (lavanderías e comercio local).

TRES NOVAS ACELERADORAS EN GALICIA

Estes días están a dar comezo tamén as accións de formación e asesoramento no resto de espazos coworking da rede impulsada pola Xunta, que nesta edición contará con tres novas aceleradoras relacionadas con actividades específicas. Así, a do Ribeiro, situada no municipio ourensán de Cenlle, promoverá a agroalimentación, o turismo rural e a economía circular, mentres que a aceleradora de Palas de Rei  centrarase no Camiño de Santiago para fomentar o emprendemento na ruta xacobea. O espazo que se abrirá no Morrazo, en Moaña, impulsará a procura de novas oportunidades a emprendedores e empresarios relacionados co sector naval.

As novas aceleradoras súmanse ás xa en funcionamento en edicións anteriores, abertas na Ribeira Sacra (Monforte de Lemos); Terras da Limia (Celanova); Santiago de Compostela; Ferrolterra (CIS Galicia en Ferrol), e O Salnés (Vilanova de Arousa), e a Costa da Morte (Cabana de Bergantiños), ademais da de Mondoñedo.