Renfe informou este martes de que de amplía desde o vindeiro luns, 9 de novembro, os servizos de proximidade de ancho métrico, o coñecido como Feve, entre Ferrol e Ortigueira con dous servizos, un por sentido, entre ambas as localidades; máis un que circulará os domingos. Non así, polo de agora, na liña de media distancia, entre a capital ferrolá e Ribadeo.

Os dous novos servizos circularán de luns a venres con saída de Ortigueira ás 6.35 horas e chegada a Ferrol ás 7.51 horas. En sentido inverso, sairá de Ferrol ás 20.05 horas e chegará a Ortigueira ás 21.22 horas.

Ademais, os domingos haberá un tren entre Ferrol e Ortigueira con saída ás 20.52 e chegada ás 22.09 horas. Desta forma, a oferta diaria de trens de proximidade de ancho métrico en Galicia sitúase en 16 servizos de luns a venres; catro os sábados e cinco os domingos.

Os novos servizosresponden, remarca Renfe, ao compromiso adquirido na reunión mantida o pasado 14 de outubro coa alcaldesa de Moeche e os alcaldes de Burela, San Sadurniño, Ortigueira e Cerdido co fin de mellorar o servizo de ancho métrico e estudar a incorporación destes servizos entre Ortigueira e Ferrol.

Na xuntanza os dirixentes da operadora negáronse por agora a restituír horarios na liña Ferrol-Ribadeo, que queda con un único viaxe diario por sentido, situación que se mantén desde o estado de alarma. A operadora xustificou a redución nun 75% das frecuencias na escaseza da demanda, pero tanto alcaldes como usuarios ven imposible recuperala sen restituír antes o servizo.

Consultadas sobre a liña, fontes de Renfe confirman que “polo momento” a liña de media distancia Ferrol-Ribadeo “mantense como até agora; calquera nova incorporación ao respecto comunicarase”.