EFE | A Dirección Xeral de Emerxencias e Interior da Vicepresidencia Primeira da Xunta activou este sábado unha alerta laranxa por temporal costeiro no litoral lucense e no noroeste da Coruña a partir deste mediodía.

Segundo indica a Axencia Estatal de Meteoroloxía (Aemet), a partir deste mediodía comezará un fenómeno meteorolóxico adverso de nivel laranxa con vento de suroeste-oeste de forza 8 en Prior-Bares, con mar combinada do oeste, que deixará ondas de entre 4 e 5 metros na Coruña.

Na Mariña espérase vento do oeste de forza 8, principalmente en Bares e mar adentro, con mar combinada do oeste suroeste e ondas de 4 a 5 metros. Os refachos poderán superar os 70 km/h.

O resto do litoral galego permanecerá en nivel amarelo.

A Xunta lembra a importancia de manterse afastado da liña de costa para evitar ser arrastrado ou golpeado pola auga.