“O concello do Valadouro está realizando en Ferreira unha mellora da circulación viaria que moitos veciños tildan, con razón, de absurda”. É a denuncia que fai María José Fernández, voceira de Unión Democrática Independente do Val ( Udival).

Nun comunicado denuncia que o goberno municipal leva semanas poñendo sinais tras mercar 119. “Algunhas estanse a colocar nos lugares más inverosímiles e perigosos, incluso directamente na vía, cando está demostrado que este tipo de sinais supón un risco, sobre todo  para motoristas e ciclistas, e de feito, nestes poucos días,  algunha xa foi a causa de accidentes, grazas a Deus sen danos persoais polo de agora”, indican desde Udival.

Tal é o suposto desorde da sinalización do concello que maría José Fernández ironiza con que agora xa se pode “propoñer á Xefatura Provincial de Tráfico que teñan este pobo en conta para a realización das probas da licenza de conducir”. “Se un chofer novel logra superar unha voltiña por Ferreira, sen saltarse o levar por diante algún sinal, estará preparado para circular  por calquera cidade  do mundo sen problemas”, chancea.

Neste sentido, destaca que hai sinalización que “roza o absurdo” como é  o caso de Triana, na que a veciñanza “vense obrigada a baixar e subir como nun Scalextric”.  Tamén critica os accesos ao centro ou as saídas cara a Foz, Mondoñedo ou Ribadeo porque son desviados por un colexio,  a piscina, un parque infantil, a gardería,  a residencia da terceira idade e a Casa da Cultura.

“O que queda claro e que agora quen veña a Ferreira e ata os que vivimos aquí teremos que poñer os cinco sentidos e fixarnos moito, pois con tanta sinalización e normas novas, con nada que nos despistemos ou entreteñamos pode que acabemos“infrinxindo a lei”, remata ao criticar un proxecto de sinalización no que o concello gastou 50.000 euros.