O presidente do comité de empresa de Alcoa, José Antonio Zan, afirmou que, por unanimidade, a representación dos traballadores tachou de “inadmisible” a proposta da empresa e prometeu “15 días de paz social” para fixar unha postura común coa Xunta e o Goberno para conseguir “levar a cabo unha venda (da planta) antes do día 30” de setembro.
Así se pronunciou, en declaracións remitidas aos medios, despois de que Alcoa propuxese un ano para resolver o problema enerxético e comprometésese a despois abordar a venda directa da factoría de Cervo nunha reunión mantida coa ministra de Industria, Comercio e Turismo, Reyes Maroto. Anteriormente, tras manter un encontro co CEO de Alcoa en Pittsburgh, a ministra sinalara que se aspiraba a que a venda se anunciase “como moi tarde o 30 de setembro”, un obxectivo que a representación dos traballadores afirmou que comparte.
A este respecto, Zan afirmou que o comité de empresa considerou, por unanimidade, que “os termos da proposta de Alcoa son inadmisibles”. Así, explicou que se acordou “dar 15 días de paz social” por “responsabilidade”, o que levará unha nova prórroga da suspensión da folga, para levar a cabo reunións cos distintos axentes.
En concreto, avanzou que se prevé celebrar a reunión cos sindicatos e o Goberno que se solicitou o pasado venres e que “a ministra (Reyes Maroto) comprometeuse a dar”. Ademais, ao longo da seguinte semana, indicou que, unha vez posto en común un posicionamento dos sindicatos, o Executivo central e a Xunta, aspirarase a manter en encontro coa multinacional para que acepte as condicións acordadas e “ter futuro na planta” ao “levar a cabo unha venda antes do día 30” do próximo mes.
XUNTA
O vicepresidente segundo da Xunta, Francisco Conde, reclamou que o Memorando de Entendemento (MOU) proposto por Alcoa no que esta non iniciaría o despedimento ata dentro dun ano e mantería as operacións da planta de Cervo represente “un contrato de venda efectivo” da mesma, en lugar de “unha declaración de intencións”.
Así, dixo que a Xunta non ten responsabilidade e que “tanto o Goberno como Alcoa deben sentar e deben tomar decisións” tras “dous anos con declaracións de ambas as partes”. Así, sinalou que a empresa “traslada que quere vender” e o Goberno afirma que desenvolverá un marco enerxético competitivo, pero “ningún dos compromisos está a cumprirse”.