O presidente do comité de empresa de Alcoa, José Antonio Zan, sinalou que se atopan preparando as propostas que porán “en común co Goberno e a Xunta” co fin de “desbloquear a situación” e continuar coa venda da factoría.
Estas estarán preparadas antes do próximo día 20 de agosto, puntualizou o sindicalista de Comisións Obreiras, data que cadra cos “15 días de paz social” que expuxera o comité para fixar unha postura común coa Xunta e o Goberno de cara a lograr a venda da planta antes do 30 de setembro.
Zan defendeu que a multinacional non gaña diñeiro coa factoría de San Cibrao é “porque non quere”, dado que a factoría segue producindo “ao mesmo ritmo” de 2019, “que é cando a empresa baixou a produción nun once por cento”.
“Se non gaña diñeiro é porque non quere. Se arrincasen as cubas que están paradas seguramente gañarían máis diñeiro”, considerou, dado que “está claro que a produción de aluminio é rendible a nivel mundial.
“Tamén é verdade que necesitamos que o marco enerxético sexa estable e garanta uns prezos competitivos. Meter enerxías de custo máis reducido, pero iso tanto para nós como para o resto de cidadáns”, destacou.
José Antonio Zan lembrou que Alcoa leva 15 anos traballando sen un marco enerxético e un proxecto enerxético e que o principal inconveniente e dificultade coa que se atopa a planta da Mariña “é o prezo do megawatt á hora de comprarse por xunto”.
O presidente do comité de empresa calculou que producen “ao redor das 19.000 toneladas” de aluminio mensuais, “pouco máis de 200.000 toneladas ao ano”, mentres que antes producían 232.000 toneladas e 1.600.000 toneladas de alúmina anuais.
