A presidenta do PP de Lugo, Elena Candia, reivindicou melloras na conexión ferroviaria Ferrol-Ribadeo, polo que emprazou o Goberno central a que acometa un estudo para desdobrar a vía.

A través dunha proposición non de lei, os populares instan o Executivo a que “encargue unha análise económica e técnica para estudar un reforzo das comunicacións, unha dobre vía, que permita non descolgar a esta parte do territorio desa planificación de futuro que é a chegada do AVE a Lugo”.

“A Mariña é poboacional e socioeconomicamente unha parte moi importante da provincia que podería quedar en absoluto abandono”, advertiu a presidenta dos populares de Lugo, que este venres estivo en Ribadeo acompañada polo vicesecretario de Participación do Partido Popular e deputado nacional Jaime de Olano.

Trátase de “unha iniciativa para estudar posibilidades de mellora que permitan un reforzo na conexión Ferrol-Ribadeo e outras posibilidades para vertebrar a provincia”. “Hai que tentar conseguir unhas mellores infraestruturas que son fundamentais para ter o territorio vertebrado e eliminar desigualdades territoriais e favorecer a dinamización económica”, subliñou.

En definitiva, Candia resumiu que o que perseguen é “buscar a ampliación da vía, que se mellore e se poida transformar e logo se poida conectar con Santiago (o AVE) a través de Begonte”.

CONGRESO

Polo demais, sobre o congreso que a volverá situar á fronte da presidencia do PP de Lugo o 19 de setembro, Candia asegurou que de momento non ten perfilado o equipo que a acompañará. Si destacou o relatorio sobre o que se traballa, e ao equipo organizador do congreso ao que aproveitou para felicitar polo “seu enorme traballo”. O relatorio, dixo, pivota “sobre esa idea e interese de que non só se escoite á militancia, que tamén é imprescindible, pero igualmente á sociedade”.