O persoal de Alcoa en San Cibrao, en Cervo, volve estar convocada a unha folga indefinida a partir deste luns ás 14,00 horas fronte ao “bloqueo” da venda da fábrica.

Os traballadores celebraron o pasado mércores unha asemblea na que se votou a medida, que saíu avalada por unha ampla maioría e fóra de oito persoas que se pronunciaron en contra.

O paro seguirá os mesmos procedementos e condicións do anterior, tendo en conta que o que houbo foi unha suspensión para tratar de facilitar as negociacións para a venda. Ante a falta de acordo, agora reactívase a folga, segundo explicou o presidente do comité de empresa, José Antonio Zan.

Zan lamentou a falta de negociacións e de acordo “por Alcoa estar a bloquear esa venda e o Goberno non dar as garantías que se necesitan”. Todo isto, a menos dun mes de que os maxistrados da sala do social do Tribunal Supremo debatan, o próximo 20 de outubro, sobre o recurso que interpuxo Alcoa contra a anulación do expediente de regulación de emprego (ERE) para máis de 500 traballadores que pretendía aplicar na planta de Cervo.