O comité de empresa de Alcoa Cervo enviará un documento dirixido ao presidente da Xunta, Alberto Núñez Feijóo, para instarlle a que esixa do Goberno central a intervención pública temporal da fábrica para que posteriormente sexa transferida a un terceiro.

Coa vista posta en que se produza este movemento, que foi aprobado tanto no Congreso dos Deputados como no Parlamento de Galicia, os traballadores da planta concentraranse o vindeiro domingo 10 en Lugo.

O presidente do comité, José Antonio Zan, esperou que a Xunta “se poña ao lado dos traballadores e esixa esa intervención que todos os partidos votaron e que aínda está sen levar a cabo por parte do Ministerio de Industria”. “É fundamental para salvar a situación e conseguir que a venda prospere“, urxiu, antes de criticar que a ministra “a día de hoxe aínda non cumpriu co mandato do Congreso e do Parlamento”. Por iso, o comité cre “que debe ser o presidente da Xunta quen debe deixarse de ambigüidades e pedir esa intervención canto antes”.

A mobilización do domingo 10 producirase ante a Subdelegación do Goberno en Lugo, onde o comité anuncia “unha gran sorpresa para os asistentes”. A 20 días de que se reúna o Tribunal Supremo para valorar a anulación do ERE na factoría, os representantes dos traballadores auguran que os maxistrados validarán os 10 puntos polos que a xustiza galega tombou ese despedimento colectivo, e remarcan que “está ben xa de deixar en mans dos xuíces o que teñen que facer os políticos”.

Neste sentido, advirten de que os potenciais compradores “tiveron moita paciencia” e “non se sabe que vai ser deles se o Goberno segue dilatando esta situación e se Alcoa se segue agarrando a esta retirada da SEPI (a sociedade estatal de participacións industriais)” da operación.

No que vai desde o regreso á folga indefinida, calculan que deixaron de saír unhas 2.000 toneladas de aluminio, pero remarcan que están así “non” porque lles “guste”, senón porque non lles quedou “outro remedio”.