Fontes do Xulgado de Viveiro e de Mondoñedo denuncian que levan dous días sen poder traballar debido a que a súa principal ferramenta informática, o programa Minerva, “non funciona”.
Dende os xulgados trasladan ao Xornal da Mariña que se descoñece a causa deste erro informático que detén por completo a actividade e apuntan á Xunta por ser “incapaz de solucionalo”: “Parécenos incrible que nos tempos de hoxe se paralice toda a Administración de xustiza galega por este motivo que a Xunta é incapaz de solucionar”.
Aseguran, ademais, que a situación dos xulgados viveirenses é “cada vez máis penosa” en canto á carga de traballo, sen un “compromiso firme” por parte das Administracións autonómica e estatal para dar unha solución a curto prazo. A iso engádense agora as múltiples “deficiencias” nas aplicacións telemáticas que, aseguran, padecen a diario: “Dende o programa Minerva ao Punto Neutro, pasando polo Rexistro Electrónico de Apoderamentos, a conta bancaria ou o sistema Lexnet… É rara a semana que non hai problemas con algunha das aplicacións informáticas que se utilizan acotío na oficina xudicial”, critican.
Dende AMTEGA (Axencia para a Modernización Tecnolóxica de Galicia) confirman que durante a xornada deste luns e martes tivo lugar unha “incidencia técnica que provocou interrupcións no acceso ao sistema Minerva e ao proceso de sinatura a través del”. Indican que “afectou parcialmente” e que o servizo xa funciona con normalidade no “70% dos partidos xudiciais, incluídos os de Mondoñedo e Vivieiro”.
A pesar da incidencia en Minerva, durante a xornada do luns púidose desenvolver “parte da actividade” dos xulgados, xa que se asinaron un total de 14.700 documentos, resolve AMTEGA.
