O grupo Vía Alfoz sinala que o Concello de Alfoz creou na lexislatura diferentes rutas de sendeirismo que transcorren polos principais recursos turísticos, culturais e naturais do municipio. Aínda que “o actual goberno municipal, está sendo incapaz de garantir o debido mantemento destas sendas, tanto no que se refire á limpeza, como á sinalización e a reparación de elementos deteriorados“.

Desde VIA Alfoz consideran que isto se debe a unha xestión deficiente das rutas por parte do actual goberno. Tal e como indican, “desde que nun pleno o señor Val nos indicou que solo se limparían aqueles camiños que permitisen o desbroce mecánico, cambiáronse trazados sen indicalo nos paneis informativos, nin nas App’s e folletos turísticos do concello”.

Ademais, denuncian “a desaparición de paneis informativos, sinais e balizas, de forma que, nalgúns puntos, as indicacións son escasas e confusas para os usuarios”, e recordan que a sinalización desaparecida, por vandalismo ou pola retirada de indicativos, “nunca se repón” e a existente “móvese ao antollo do goberno”.