O C.D. Alfoz denuncia nun comunicado os “graves insultos racistas de maneira continuada” que sufriu un dos seus xogadores. Ocorreu no partido entre Meira CF e o C.D. Alfoz o domingo 16 de marzo no estadio da Lomba en Meira.

Os feitos narrados no comunicado do C.D. Alfoz comezaron durante a primeira parte do encontro, nunha acción de disputa de balón entre os dous equipos. Nese momento desde a grada dentro dun grupo de afeccionados locais berran “VAITE NA PATERA” e “no medio das risas de varios dos presentes”. Desde o banco do C.D. Alfoz pediron ao árbitro que os comentarios coma ese debían parar ademais de ter que informar ao delegado de campo.

No comezo da segunda parte os risos e comentarios cara o xogador do Alfoz continúan, até que no minuto 70, tal e como se recolle na acta do partido, outro insulto racista volve saír da grada: “NEGRO DE MERDA”.

Despois disto, o xogador claramente afectado ante os continuos insultos dirixiuse ao colexiado para que resolvese a situación dalgunha maneira. O colexiado parou o partido durante 5 minutos, acción que tamén se recolle na acta. Aínda así, non tomou ningunha acción para identificar e expulsar a quen profería os comentarios e insultos racistas.

Unha vez reanudado o xogo despois da parada de cinco minutos e cando o xogador insultado recibe un balón, volven escoitarse berros e asubíos desde as gradas. Ante isto, o xogador en cuestión pide o cambio negándose a seguir xogando baixo esas circunstancias.

O C.D. Alfoz fixo público un comunicado para defender a decencia do xogador do seu plantel quen tivo que sufrir os insultos e desprezos. O clube de Alfoz tamén quere concienciar e facer ver que o racismo segue a ser un problema presente nalgún campo de fútbol e por extensión, na nosa sociedade.

O C.D. Alfoz denuncia que non é a primeira vez durante esta tempada se produce algún comentario racista cara algún dos nosos xogadores, aínda que até o de agora se puido parar e manterse como un suceso illado e puntual. Porén, nesta xornada “a situación chegou a niveis que creemos que superan os límites da dignidade e respecto cara calquera persoa”.

O CD Alfoz engade tamén que considera o vivido no partido desta fin de semana é algo verdadeiramente serio e dunha enorme gravidade. “O fútbol e o deporte ten que separarse e fuxir de toda falta de respecto e insulto a un deportista pola súa orixe ou cor de pel”.

Despois do ocorrido, “o noso Club reafírmase na condena deste tipo de accións e comunica que de volver a ocorrer algo similar nalgún outro campo, xa sexa local ou visitante, se pedirá deter o partido e negarase a reanudalo ata que a persoa ou persoas que realizan tales comentarios sexan expulsados”. Finalmente, o CD Alfoz solidarízase e dá ánimos a todos os xogadores que teñen que aturar comentarios deste tipo cada semana. “Seguiremos loitando para eliminar o racismo ou xenofobia do noso deporte. Facelo, é un traballo de todos e todas”.