O Mercado Medieval de Alfoz, que celebrará este ano a súa XXIII edición, non é un evento, unha feira nin un espectáculo, senón todo xunto e moitas máis cousas. É sobre todo un sentimento, un soño e unha ilusión, compartida por moitísimos veciños e amigos que aparcaban todo o demais para traballar xuntos e conseguir que calquera que se achegase ao Castro eses días quedase inevitablemente inmerso na maxia dos contos. O Mercado Medieval de Alfoz é un selo da nosa xente, un símbolo do amor dun pobo polo pobo.

Os traballos xa comezaron e volven os soños a fluír un ano máis, eses que ten o voluntariado que o fai posible e ve, con humilde agradecemento, que o seu esforzo é recompensado con desfrute propio e alleo. Pero é xustamente ao revés, somos todos os demais quen temos que agradecerlle inmensamente a esa xente que o fai posible, e por encima diso, todo o que podemos aprender deles.