Dous milleiros de persoas manifestáronse este xoves en Burela, convocados pola Plataforma na Defensa da Sanidade Pública da Mariña, para esixir a mellora dos servizos sanitarios tanto no Hospital da Costa como nos centros de saúde, e para reivindicar que a bisbarra conta con entidade suficiente para recuperar a área sanitaria suprimida polo Servizo Galego de Saúde (Sergas).
Cando se cumpre un ano da aprobación da reforma da lei de saúde, que supuxo a supresión das áreas sanitarias da Mariña Lucense e Monforte, asimiladas pola Estrutura Organizativa de Xestión Integrada (EOXI) de Lugo, Cervo e Monforte, os convocantes chamaron á poboación mariñá a manifestarse polo “deterioro dos servizos”.
PERDA DE AUTONOMÍA
O colectivo entende que a supresión da área, e con ela a perda de autonomía e capacidade de xestión dos servizos sanitarios ofrecidos na Mariña Lucense, está detrás da perda de calidade sanitaria tanto no Hospital Público da Mariña como en atención primaria.
De feito, remarcan, a veciña comarca de Ferrol, cun número similar de habitantes e distancias menores da que hai desde a Mariña Lucense a Lugo, non está considerada como distrito, como si acontece coa bisbarra.
Con lemas como “non queremos nacer na Xesta“, “a sanidade deféndese goberne quen goberne” ou “a saúde non é un negocio“, os manifestantes partiron do centro hospitalario burelao para rematar o acto reivindicativo na Praza do Concello. Alí, o médico do centro de saúde de Burela Carlos Fernández Fraga leu un manifesto que sintetizou as reivindicacións.
“Na Mariña Lucense non nos rendemos nin nos resignamos”, comezou Fernández Fraga.
A plataforma cualificou de “desvergoña” o anuncio do Sergas, trala reforma da lei de saúde, de que a bisbarra contaría “con máis e mellores servizos” e da “blindaxe” do Hospital Público da Mariña, cando a sanidade pública na comarca “está a padecer un deterioro constante”.
“Estamos aquí para preguntarlle a quen dirixe a nosa sanidade onde están os máis e mellores servizos prometidos”, remarcou Fernández Fraga.
Os manifestantes reclamaron ao Sergas “máis recursos humáns e materiais” aos centros de saúde e que “a ampliación de edificios do Hospital Público da Mariña vaia acompañada dunha dotación de máis servizos”.
HOSPITAL DA COSTA
No relativo ao Hospital Público da Mariña, os manifestantes esixiron a dotación da resonancia nuclear magnética fixa, dunha consulta de cirurxía vascular ou a recuperación da implantación de marcapasos e das operacións de fimose pediátrica foron algunhas das demandas dos manifestantes.
Tamén se solicitou a creación de prazas públicas de logopedas e terapeutas ocupacionais e a dotación dunha consulta de enfermería oncolóxica.
Os manifestantes tamén esixiron que rematen as derivacións aos hospitais privados de Lugo e A Coruña e as privatizacións de servizos hospitalarios, coma o mantemento ou as historias clínicas.
ATENCIÓN PRIMARIA
No tocante á atención primaria, a plataforma esixiu a creación de prazas de persoal de tódalas categorías profesionais en xornada ordinaria e a redución de cupos. Segundo expuxo o colectivo, o máximo permisible serían 1.250 tarxetas sanitarias por médico e enfermeira, e 800 por pediatra. Así mesmo, reclamouse dotar destes especialistas a todos os centros de saúde.
A cobertura do 100% das ausencias en todas as categorías foi outra das demandas expostas na manifestación, ante as reiteradas queixas en varios municipios da comarca –Mondoñedo, Lourenzá e Barreiros, Ribadeo, Viveiro ou Xove– pola non substitución dos profesionais.
Tamén se demandou o reforzo dos Puntos de Atención Continuada (PAC), coa petición de dous equipos completos en todos os ambulatorios.
APOIO VECIÑAL, SINDICAL E DA OPOSICIÓN
A convocatoria tivo o respaldo de todas as forzas políticas da oposición. A deputada do BNG Olalla Rodil ou o secretario xeral do PSdeG, Gonzalo Caballero, asistiron á protesta.
A través dun comunicado, Caballero lamentou “asupresión das áreas sanitarias”, que interpreta como “unha mostra de como o PP non entende a importancia de ter unha sanidade pública de calidade, gratuíta e próxima”. O secretario xeral dos socialistas galegos subliñou que desde a reforma da lei de saúde, a plataforma sanitaria da Mariña recadou “máis de 1.500 reclamacións”.
Alcaldes de Burela, Ribadeo, Trabada, Ourol, O Valadouro e Alfoz -cuxos equipos de goberno fletaron autobuses– así como membros do goberno local de Viveiro, acudiron á cita. Tamén estivo o rexedor da Pontenova e presidente da Deputación, Darío Campos.
Sindicatos e colectivos de pensionistas sumáronse tamén á manifestación convocada pola plataforma sanitaria da Mariña.
Imaxes e vídeo cedidos por CIG Saúde.
