O concelleiro de Cultura, José Díaz, anima á veciñanza a asistir ao concerto que David Catá ofrecerá este sábado, 14 de xaneiro, na Casa da Cultura de Burela.
O edil burelés convida a asistir a esta cita: “desde a Concellería de Cultura de Burela queremos convidar a toda a xente que se queira achegar este sábado, 14 de xaneiro, ás oito e media da tarde ao auditorio da Casa de Cultura de Burela para gozar do concerto de David Catá, que se chama Origen”.
Díaz explicou que “David Catá ten unha presenza destacada en Burela xa que gañou o certame AmArte do muro portuario nunha ocasión, quedou segundo noutra e foi o presidente do xurado no últimas tres edicións. Neste caso vén con outra das súas facetas artísticas, das múltiples que ten, que é a musical: é un excelente compositor e acaba de sacar un disco titulado Origen, que presentará no noso auditorio; temos ese pracer e ese luxo de telo connosco. Así que oxalá que enchamos o auditorio o máis posible, que lle acompañemos todos e que gocemos da súa música, que o fai de marabilla; é unha música para gozar, para relaxarse, un puro pracer”.
O concelleiro de Cultura de Burela subliñou que “temos que apostar por todos os que crean arte na Mariña, neste caso David Catá, que é multidisciplinar. É un mozo de Viveiro, pero que un pouco perténcenos a todos porque A Mariña temos que percibila como un conxunto onde cada pobo ten algo que achegar e entre todos é a forma de facer máis grande esta comarca”.
