A Plataforma Sanitaria da Mariña convocou este martes unha rolda de prensa onde presentou publicamente a manifestación do día 19 de xaneiro. Esta manifestación percorrerá a localidade de Burela desde a súa saída da entrada principal do Hospital da Mariña, ás 20 horas, baixo o lema “Contra o Desmantelamento da Sanidade Pública”.
MOTIVOS PARA SAÍR Á RÚA
A Plataforma chama a mobilizarse masivamente “porque seguimos a reclamar a recuperación da área sanitaria que o PP e o goberno da Xunta eliminaron”. Este féito valórano como unha medida tomada de xeito unilateral e sen contar coas maiorías sociais, que “nos opuxemos frontalmente liderando a loita social que naqueles momentos se desenvolveu no país”.
A Plataforma denuncia que esta decisión trouxo consigo a centralización da maior parte dos servizos na macroárea da capital, “afastando a asistencia sanitaria das persoas”. Actualmente “cinco anos despois deste espolio, a nosa sanidade pública é mais precaria, máis alonxada das persoas, e está proxima ao seu total desmantelamento“.
EIVAS ATENCIÓN HOSPITALARÍA
Durante a rolda de prensa denunciáronse as listas de espera de até “dous ou tres anos para consultas como cardioloxía, traumatoloxía, uroloxía, reumatoloxía ou para facer unha ecografía”. Derivacións a Lugo para probas como radiografías panorámicas dentais, densitometrías, electromiografías ou intervencións coma marcapasos ou varices.
Denuncian a falta de servizos básicos como unha consulta de cirurxía vascular e a carencia de terapia ocupacional ou de fisioterapia respiratoria infantil. En Saúde Mental , e como consecuencia directa de carecer de Área Sanitaria propia, non se dispón de Unidade de Prevención de Suicidios nin do Hospital de Día Infantoxuvenil, unidades recentemente creadas en Lugo. “A logopedia sigue a estar en mans privadas”.
ATENCIÓN PRIMARIA
Neste apartado falan de esperas de quince días para poder acceder a unha consulta. Segue sen substituirse o persoal ausente por permisos, vacacións ou baixas chegando asitucións insostibles para os centros. Isto trae que máis do 50% dos médicos de familia estean sen cobertura, “centros cun só facultativo dun total de dez e mesmo centros sen ningún facultativo”.
Por último, a recollida de sinaturas en apoio da ILP de Medidas Urxentes para e Fortalecer a Atención Primaria está a ser “un éxito tanto no país como na Mariña”. A recollida seguirá ata despois da manifestacióna para xa entregalas no Parlamento sobre finais de xaneiro ou principio de febreiro.
