A protesta, convocada pola Plataforma Sanitaria da Mariña, contou coa participación da portavoz nacional do BNG, Ana Pontón, e de membros do Partido Socialista, así como de representantes de organizacións sindicais e plataformas cidadás. Os asistentes marcharon polas rúas de Burela baixo as inclemencias meteorolóxicas con baixas temperaturas e vento.

Ao longo da procesión, corearon cánticos en reclamación dos servizos “perdidos” e contra a “privatización” da sanidade por parte da Xunta. O percorrido levounos ata a praza do concello, onde se procedeu á lectura dun manifesto no que a Plataforma Sanitaria da Mariña denunciou a “centralización” de servizos sanitarios que antes se prestaban no hospital burelao e que, agora, os pacientes deben recibir na cidade de Lugo.

Ademais, demandaron a cobertura das prazas vacantes para emendar as “longas listas de espera” para ser atendidos tanto nos ambulatorios como nos servizos hospitalarios. Todo iso, segundo os convocantes, para paliar “o colapso” da sanidade pública na Mariña, unha situación que, din, se replica “en toda” Galicia.

En declaracións aos medios, Ana Pontón cargou contra a xestión da sanidade da Xunta, á que volveu a acusar de querer “desmantelar” o sistema público para “benefeciar” ás empresas da saúde. “O PP converteuse nun perigo para a saúde da xente e non o podemos permitir”, incidiu Pontón, que subliñou que “ven agora as gravísimas consecuencias” de “13 anos de recortes e privatizacións” que, di, supuxeron a etapa do PP na Xunta desde 2009.

Unha situación que “se deixa sentir tamén” na comarca do norte lugués onde, segundo a líder nacionalista, hai “menos recursos” como consecuencia da “supresión” da área sanitaria da Mariña, que está integrada desde hai anos na do distrito de Lugo. Pontón lamentou que o hospital da Mariña “non funciona ao 100%”, o que obriga a veciños a desprazarse ata Lugo “para cuestións básicas”.

“É un síntoma máis de onde condúcenos o PP, que ten un programa moi claro: desmantelar o público para beneficiar á privada”, apostilou. Así pois, volveu a cualificar de “parches” e “ocorrencias” as medidas anunciadas polo Goberno galego, como a regulación para que os médicos compatibilicen a súa actividade no Sergas coa privada ou que os médicos residentes empecen a ver pacientes na súa última etapa de formación. “É unha enorme chapuza que paga a cidadanía con listas de espera. É o que din hoxe os veciños da Mariña. Xa está ben de recortes. Que doten de recursos a sanidade”, concluíu Ana Pontón.