O alcalde de Burela, Alfredo Llano, confía en que a próxima semana conclúan os traballos de drenaxe na focha da estrada N-642, para logo poder iniciar as obras sobre o carril afectado.

Así, Llano destacou que os operarios “se están dando présa” con estes traballos, polo que calcula que “para a semana que vén” poderían estar rematados. No entanto, evitou dar un prazo para a posta en servizo da vía de forma definitiva.

“Están os técnicos traballando. Van apurar o máximo para concluír coa drenaxe e compactar o terreo. Esperamos que se faga en pouco tempo”, reiterou. “O importante é que flúa a auga e non se volva a acumular nese punto”, engadiu.

Tal e como explicou o rexedor, “sospeitábase que podía haber unha bolsa máis de auga escondida e que puidese rebentar”, aínda que este “non foi o caso”. “Drenouse unha gran cantidade de auga, aquilo era unha auténtica lagoa. Librouse moita auga, da bolsa que rebentou e provocou a focha”, pormenorizou.

O rexedor burelense destacou que a circulación na zona está a ser “fluída, aínda que ás veces hai concentracións” durante a mañá e ao mediodía, “que é cando a xente vén traballar”. Finalmente, apremou ao Goberno central para que apure a construción da A-74, ou autovía da Mariña, e á Xunta, polo corredor mariñán.