Un total de 80 voluntarios organizados por Afundación recolleron este sábado case 300 quilos de residuos en praias do municipio lucense de Burela. Esta xornada levouse a cabo no marco do programa Plancto (Plan de Conservación Territorial ON), en colaboración co Concello de Burela. Así, os voluntarios limparon residuos das praias da Marosa e O Perdouro.
A actividade contou coa participación de persoas voluntariasde a Fundación Eu Son, a Asociación de Saúde Mental A Mariña, e a Confraría de Pescadores de Burela, así como persoas socias do Espazo +60 Afundación de Viveiro.
Entre os residuos retirados, restos de aparellos e outros obxectos plásticos extraviados durante o exercicio da pesca, como poden ser boias e sedelas enmarañadas, e anacos de redes, cabos, cordas e cabitos, pero tamén refugallos procedentes do continente, especialmente cabichas, diferentes tipos de envases metálicos, de plástico ou de vidro, tapas e tapóns de botes e botellas ou obxectos relacionados coa hixiene persoal, etc.
Esta foi a terceira das accións de limpeza de residuos en praias levadas a cabo no seo de Plancto no que vai de ano, un plan de conservación territorial que forma parte da estratexia de sustentabilidade da Obra Social de Abanca e que ata agora leva xa retiradas máis de 28 toneladas de refugallos de diferentes enclaves da costa galega.
