O concelleiro de Cultura, José Díaz, convida a asistir ao concerto que Milladoiro ofrecerá este sábado, 13 de maio, en Burela. As entradas seguen á venda.

O edil burelés contou que “este sábado, día 13 de maio, imos poder gozar dun novo evento importante no noso auditorio: neste caso é a presenza de Milladoiro, que nestes oito anos que eu levo á fronte de Cultura non puideran estar, aínda que o tentei nalgunhas ocasións e non puidera ser. Pero esta vez si que poderemos gozar deles cun concerto que creo que vai ser un auténtico espectáculo porque é un grupo que leva máis de 40 anos tocando, facendo música e compoñendo, cun estilo propio e que ademais foi fonte para outros moitos grupos que xurdiron detrás deles. Así que é un concerto moi recomendable”.

José Díaz indicou que “as entradas están á venda no despacho de billetes de Abanca, en ataquilla.com, desde 6 euros, en anfiteatro, ata os 10 euros, en platea, prezos que tentamos que fosen contidos para que haxa o maior número de xente posible. A ver se podemos encher o auditorio e conmemorar así o Día dás Letras Galegas, que se celebra o 17 de maio, pero é un día de semana e entón programar nesa xornada este concerto sería un pouco absurdo. Por iso puxémolo para o 13, pero que mellor maneira de celebrar o Día das Letras Galegas que cun grupo como este, que tanto representa a cultura, a tradición e o folclore galego”.

O concelleiro de Cultura anima á veciñanza de Burela e toda a contorna a asistir ao concerto de Milladoiro: “así que quero convidar a todo o mundo a este último evento importante do mes e de todo este mandato, sen dúbida, porque xa se achega a data das eleccións e a partir de aí xa se verá como funciona todo. Pero agora mesmo a mellor maneira de celebrar a música, a cultura e as Letras Galegas é asistir a este concerto o sábado 13 ás 20:30 horas no auditorio de Burela”.

Luis Piedrahita

Díaz fixo un balance moi positivo da actuación de Luis Piedrahita o pasado sábado en Burela: “
o balance da visita de Luís Piedrahita o pasado sábado aquí, a Burela, non pode ser mellor: case 600 persoas de aforo, que volveron unha vez máis a encher o auditorio, que gozaron moitísimo nas dúas horas de espectáculo deste home, que é un auténtico xenio do humor e do monólogo, de todos coñecido a nivel nacional. Gustou moito e había xente de toda A Mariña, algo que era o obxectivo que había cando se empezou a revolucionar a cultura aquí. Queriamos que todo o mundo da comarca viñese gozar dela a Burela, e así está a ser. Isto está a pasar e estamos contentos todos, tamén el, que xa estivera aquí hai 7 anos, xusto ese mesmo día, en 2016, e repetiu con gran éxito”.