O ‘Nuevo San Juan’ está a ser remolcado a porto tras estar máis dunha semana á deriva en augas francesas despois do incendio sufrido o pasado 2 de xullo en Gran Sol, que obrigou a rescatar aos seus 15 tripulantes.
En declaracións a Europa Press, a Organización de Produtores Pesqueiros do Porto de Burela, Sergio López, indica que aínda non se sabe a que lugar se dirixe “porque a aseguradora está con distintos trámites tanto en Galicia como en Asturias, e tamén se barallou o País Vasco”.
Explica que “o barco ten que quedar nun sitio no que as empresas teñan despois acceso a el”. Así, o pesqueiro con base en Burela “está moi danado e suponse que terá que acabar en despezamento”.
Deste xeito, insiste en que “é un tema que leva a aseguradora, que confirmou que onte estaba en ruta”, polo que descoñecen as horas que pode levar a chegada a terra. Mentres, os 15 tripulantes xa se atopan de volta en Burela desde hai uns días. A súa chegada foi graduada en diferentes grupos, cun atraso do tres últimos pola perda de documentación ao abandonar o barco
Os 15 tripulantes foron rescatados polo barco ‘Novo Confurco’ –con base en Vigo– cando estaban en balsas salvavidas. O ‘Nuevo San Juan’ é un palangreiro de fondo que está activo desde maio de 1999 e pertence ao censo unificado da frota de NEAFC, realiza a súa actividade en augas do Gran Sol e de Francia (golfo Biscaia), dedicado especialmente ás capturas de pescada de petisco. Ten 31,5 metros de eslora.
