Os servizos de emerxencias conseguiron sacar polo maleteiro ao condutor dun vehículo que se saíu da vía, chocou contra un farol e quedou envorcado sobre un lateral no municipio lucense de Burela.

Segundo trasladou o 112 Galicia, o suceso ocorreu sobre as 15,00 horas na rúa Mariñeiro. Un particular deu aviso á central de emerxencias e, a partir de aí, os operadores do 112 activaron un operativo para o que se mobilizou aos Bombeiros de Barreiros e aos membros do GES de Cervo, así como aos servizos sanitarios.

Xa no lugar, para poder liberar o ferido, abriron un oco polo maleteiro do coche e romperon o separador de carga. Con esta operación, o equipo de Urxencias Sanitarias de Galicia-061 puido acceder ao ferido antes de trasladalo ao centro hospitalario de referencia.