-Vas “asumir” o Proxecto Neo, a súa dirección, é así?
Si. Proxecto Neo é un espazo que creou Bernardo Penabade e tamén dirixiu durante todos este anos. O caso é que Penabade xubílase a finais deste ano lectivo e así, digamos, asumo a dirección do programa. Estamos aínda no proceso de aprendizaxe e vendo como se prepara todo.
-Tes preparados algúns perfís para abordar Proxecto Neo?
Nun principio a idea é dar continuidade ao que xa hai. Seguirmos co programa de radio como ferramenta didáctica e educativa que funciona moi ben e permite ao alumnado que non teñen bos resultados dentro do sistema tal e como é, pois ese alumnado aprende a asumir compromisos, ver que a aprendizaxe non é só receber senón receber e dar. Así pois, de momento non teño nada perfilado para dar continuidade ao proxecto tal e como existe. Aproveitar o coñecemento do contorno de Burela, que o alumnado coñezan as persoas de Burela, os proxectos da vila e sexan eles propios quen busquen maneiras de obter información por eles mesmos.
-Isto sería unha maneira de fortalecer a idea de interrelacionar as diversas realidades sociais e culturais que viven no concello?
A idea é dar voz a través de Proxecto Neo a todas as expresións sociais e políticas que existen nesta vila. Isto coa idea de que o alumnado coñezan esas iniciativas e mesmo participar delas dalgunha forma. Ao mesmo tempo é unha maneira de abrir horizontes e que a educación non está só dos muros da escola para adentro pois tamén está fóra deses muros e dentro desa participación aprendemos e crecemos as persoas.
-Tes pensado incidir o teu traballo sobre algunha parte social ou cultural de Burela e que se reflicte no alumnado do Perdouro?
Pois non especialmente. Si é certo que durante este ano lectivo estamos tentando coller e dar un espazo ao alumnado que procede da comunidade caboverdiana e abrírmonos á súa lingua, que poidan expresarse na lingua aprendida por eles no seu país de orixe ademais de darlle esa dimensión internacional á nosa lingua, o galego. Queriamos incidir por aí, pois eles moitas veces gustan de expresarse en galego, e por iso queremos facer ver que coa lingua falada por eles tamén teñen cabida na nosa.
-Que respostas ves dentro das diferentes comunidades que se achegan a proxecto NEO?
Sobre todo vexo vontade de participar, de estar aí cando é necesario estar, nese sentido é moi positiva a participación do alumnado.
-Algunha comunidade ten interese especial na aprendizaxe da túa materia, lingua portuguesa?
A cousa vai de vagar, non hai ofeta de portugués nos niveis da ESO como segunda lingua. Só se está ofertando en bacharelato e ofrecemos o programa CUALE que é para formación para preparar as probas de certificación da Escola Oficial de Idiomas. O ano pasado houbo unha tentativa de ofrecelo como primeira lingua pensando na comunidade caboverdiana, mais houbo un número moi baixo de matriculados e non puido saír adiante.
