Outro dos mariñeiros do boniteiro galego ‘Mar de Annea’ atracado en Santoña (Cantabria) e procedente de Burela deu positivo por coronavirus, co que xa se confirma o contaxio de dous dos tres tripulantes desta embarcación.

Os tres integrantes da tripulación foron trasladados en transporte sanitario ao albergue de Solórzano. Alí permanecerán en corentena xunto a outros sete pescadores pertencentes a outras dúas embarcacións galegas que realizarán unha corentena preventiva en Cantabria, segundo informou nun comunicado a Consellería de Sanidade.

Ademais, o resto de posibles contactos dirixíronse aos seus portos de orixe, onde as autoridades sanitarias das súas respectivas comunidades autónomas xa están advertidas e encargaranse de tomar as medidas oportunas.  Con esta actuación Sanidade conclúe o control epidemiolóxico dos mariñeiros para centrarse no estudo de contacto noutros ámbitos.

No caso de Cantabria, a Dirección Xeral de Saúde Pública e o Servizo Cántabro de Saúde (SCS) realizarán probas de PCR e seguimento habitual aos pescadores que permanecen illados no marco da activación de todos os protocolos de control e seguimento que o Goberno de Cantabria puxo en marcha para extremar as precaucións, anticipar a detección de posibles casos e proceder de inmediato ao seu illamento e para evitar calquera risco de transmisión da enfermidade.

Saúde Pública realizou as determinacións de posibles contactos dos mariñeiros e en todas as probas os resultados de PCR para COVID-19 foron negativas.   Polo novo positivo detectado hoxe, xa se realizaron en Cantabria un total de 23 PCR na contorna estreita do caso índice e estase facendo seguimento a 32 contactos.