O Concello de Burela ofreceu esta mañá un acto de homenaxe ao Pescados Rubén Burela de fútbol sala feminino tras os últimos éxitos colleitados polo equipo. As xogadoras e o equipo técnico e directivo recibiron agasallos e firmaron no libro de ouro do Concello.
O concelleiro de Deportes, Ramiro Fernández, lembrou que era un acto que xa tiña comprometido o alcalde cando viñeron ofrecer a súa Copa da Raíña ao Concello. “E hoxe plasmamos esa promesa feita polo alcalde e firmaron no Libro de Ouro do Concello”, indicou.
“Foi un acto bonito e agradable, e a verdade é que lles fixo moita ilusión firmar no Libro de Ouro do Concello. Ademais entregamoslles un pequeno detalle de recordo dos últimos títulos conseguidos, a Copa da Raíña lograda en Madrid e a Copa Xunta gañada hai poucas datas”, apuntou. Fernández Rey dixo que “está ben recoñecer os éxitos deportivos, máis nestas rapazas que foron declaradas o mellor equipo do mundo fai uns meses”.
