O Concello de Burela rematou este venres o proceso de selección de 2 socorristas con cargo ao Plan Único da Deputación. Pero precisa contar con 10 profesionais para atender os seus areais. Por iso, o alcalde, Alfredo Llano, critica que a estas alturas a Xunta de Galicia aínda non informase aos Concellos sobre o número de socorristas que subvencionará polo que, dixo, será imposible que o 1 de xullo comecen a traballar.

“De momento contratamos a dous, pero estamos agardando a que a Xunta saque as súas prazas dunha vez para seguir o proceso de selección e poder abrir o día 1 de xullo”, dixo. Así, destacou que o concello trata de adaptarse ás esixencias das bandeiras azuis e da xente para ter unhas praias “cubertas con toda a seguridade e ben preparadas” para que teñan todos os servizos completos e ter os socorristas xa traballando a partir do 1 de xullo.

“Pero este ano é imposible dado que a Xunta aínda non sacou o número de prazas que nos vai conceder a cada Concello e iso contradí a filosofía de ter unha calidade turística cando realmente non se pode levar adiante polos retrasos sistemáticos que se están facendo ultimamente”, denunciou.