Adeus á Feira do Bonito de Burela. A suba continuada de casos de covid vén de obrigar a suspender a tradicional celebración que cada ano lle rende este concello mariñán ao peixe. A cita terá que desenvolverse dunha forma distinta co obxectivo de garantir a seguridade sanitaria, en palabras do alcalde, Alfredo Llano.
En consecuencia, non haberá Feira do Bonito ao xeito tradicional con degustación de túnido en diferentes preparacións no peirao, pero o “príncipe azul” estará presente na hostalería local, que ofrecerá tapas e menús elaborados con este produto. O obxectivo é seguir potenciando e promocionando deste xeito o bonito de Burela.