O BNG de Burela solicitou a creación da Comisión de Memoria Histórica. Para isto recordan o pleno do 6 de agosto do 2018, onde se debatiu unha moción formulada polo grupo municipal do BNG para a retirada da Rúa e do título de fillo adoptivo de Burela ao bispo franquista Eijo Garay. Foi entón cando se aprobou unha emenda de substitución do grupo socialista para a creación dunha comisión.
Segundo o acordado no 2018, a comisión estaría formada “por representantes dos grupos políticos da corporación, historiadores ou persoas da cultura, arquitecto e secretario municipal”. Para os nacionalistas “non é unha fórmula que sexa moito do noso agrado pero ese é o acordo que se adoptou“, segundo explicou o voceiro do BNG, Mario Pillado. Dende o BNG recordan que en Burela se atopan “máis vestixios franquistas que deben ser corrixidos por Liberdade, Xustiza e Democracia“, por iso solicitan a creación da comisión.
O primeiro que debería abordar a comisión, como explican dende o BNG de Burela, é a retirada da rúa e do título de fillo adoptivo de Burela ao bispo franquista Eijo Garay, como solicitaran no 2018, pero ademais consideran que esta comisión “pode servir para rebaixar o ton e que o debate sexa tranquilo e sosegado”
PROTOCOLO PARA OS ANIMAIS ABANDONADOS
Á Comisión de Memoria Histórica sumóuselle a petición doutras iniciativas: a proposta de crear un protocolo para a recollida de animais abandonados e a maior vixilancia do acceso de turismos nas rúas peonís. Con respecto ás iniciativas relacionadas coa protectora de animais, Pillado afirma que “foi o que nos fixeron chegar dende a sociedade protectora de animais Bigotes e moitos outros veciños”. A busca de emprazamento temporal para os animais mentres non se constrúan as novas instalacións e os trámites e tempo estimado das obras foron outros asuntos polos que se interesou o grupo nacionalista.