O Festival Bal y Gay afronta a cuarta xornada do seu ciclo ‘Música á beira do mar’ cunha das actuacións máis especiais porque permitirá contemplar á emblemática Orquestra de Cámara do Festival Bal y Gay xunto á popular cantaora María Toledo e o director Jaume Santonja.

O concerto terá lugar este sábado (20:30) no Auditorio de Burela. A orquestra dirixida por Santonja interpretará obras de Debussy e Ravel antes de que María Toledo suba ao escenario para cantar ‘El Amor Brujo’ de Manuel de Falla. Icona do flamenco actual, é a artista que máis veces cantou esta obra por todo o mundo e o seu concerto no festival será a única parada en Galicia da súa actual xira española.

“Faime moitísima ilusión cantar El Amor Brujo no Auditorio de Burela. Quero dar o parabén á organización do festival por esta gran aposta. Para min interpretar a gran obra de Manuel de Falla é todo un pracer. Ademais, imos facer a versión de 1915, que inclúe cancións e recitados. Estou a desexar que chegue o 21 de agosto e dalo todo. Moi emocionada e agradecida a Galicia”, asegura María Toledo.