O alcalde de Burela, Alfredo Llano, cualificou de día histórico este 23 de decembro, data na que estiveron en Burela os atletas Ana Peleteiro e Adrián Ben, dous deportistas de elite que se achegaron á vila para participar nunha conferencia.
Llano declarou que “para o Concello de Burela é unha honra que estivesen aquí estes dous atletas dun nivel tan extraordinario e que viñesen falar das súas experiencias”. O alcalde lembrou que Burela ten moita consideración polo deporte base e estas actividades motivan aos rapaces e rapazas polos valores que se transmiten.
Ana Peleteiro e Adrián Ben participaron nunha charla sobre iniciación ao deporte e á nutrición xunto ao dietista Noel López Pinín, que causou moita expectación no auditorio da Casa da Cultura.
Ao remate do acto no Concello foilles ofrecida unha recepción oficial, á que Ana Peleteiro non puido asistir por motivos persoais, que a obrigaron a emprender viaxe rapidamente. Adrián Ben asinou no libro de honra do Concello e recibiu un agasallo de mans do alcalde, Alfredo Llano. Xunto ao rexedor estiveron os concelleiros de Deportes, Servizos Sociais e Medio Ambiente, Ramiro Fernández, Carmela López e Toñi Eijo.
