O palangre de fondo de Burela convértese na primeira frota de altura con ecoetiqueta Pescaenverde, que concede a Universidade de Santiago de Compostela (USC).

En Burela, a conselleira do Mar, Rosa Quintana, destacou o valor desta marca para certificar a actividade respectuosa da frota co medio ambiente, pois permite transmitir aos consumidores o seu perfil ambiental en termos de pegada de carbono, entre outros.

Así o apuntado no acto de entrega do certificado Pescaenverde á frota pesqueira de palangre de fondo da Organización de Produtores Pesqueiros do Porto de Burela (OPP-7), onde enxalzou o seu labor por ser a primeira da modalidade de altura que se certifica con esta ecoetiqueta que poderá empregar para a comercialización da pescada do petisco.

Nesta liña, sinala que Pescaenverde contribúe ao incremento da rendibilidade da frota, entre outras cuestións polo incremento das súas vendas ante a crecente demanda de produtos con baixas emisións de dióxido de carbono.

Esta ecoetiqueta ten o respaldo científico do Grupo de Biotecnoloxía Ambiental (Biogroup) da Universidade de Santiago de Compostela, que deseñou un software para promover o cálculo da pegada de carbono e da taxa de retorno enerxética adaptada ás características do sector pesqueiro.

No ano 2013 a Oficina Española de Patentes e Marcas expediu o título de rexistro da marca Pescaenverde. En Galicia contan con este selo máis de 30 confrarías de pescadores.