A asociación Mulleres en Igualdade de Burela reclama máis presenza policial e puntos violetas nas festas para conter a violencia machista e sexista, despois que un mozo de 18 anos entrase en prisión por unha agresión sexual en agosto na Queimada Popular en Cervo, ademais doutra investigación aberta pola Garda Civil por outro caso ocorrido nas festas patronais de Ribadeo o pasado fin de semana.

Á vista destes acontecementos, a presidenta da asociación, Mari Mar Fraga, lembrou que se “demanda moita máis seguridade, ademais de campañas de concienciación, unha maior presenza policial e que en todos os eventos se dispoña de puntos violetas”.

A través destes puntos ou mesas informativas “pódese dar apoio ás mulleres que nalgún momento poidan chegar a sentirse mal ou nalgunha situación violenta nas festas para que saiban onde refuxiarse e se lle poida ofrecer todo tipo de información”. Fraga alertou da proliferación destes casos de abusos e agresións sexuais durante as festas de verán, que achaca a que estes “individuos” se “aproveitan da multitude para esconder aquelas sustancias que poñen na bebida das vítimas ou a través das picadas”.

Polo demais, en relación á investigación por gravacións ilegais de mulleres ouriñando nas festas da Maruxaina, en Cervo en 2019, o presidente de Mulleres en Igualdade de Burela confía que en breve “se poida ter algún tipo de noticia favorable”. Durante o mes de agosto, interrompeuse a toma de declaración polo Xulgado de Viveiro ás pouco máis de 20 mulleres, de máis de cen, que aínda non prestaron testemuño por este caso.

Mari Mar Fraga quéixase de que “segue o goteo de testemuñas, pero o mes de agosto vai máis lento do normal e foi un mes onde non se citou a moitas mulleres” vítimas destas gravacións ilegais.