A asociación de Pesca Recreativa Burela nace da man de duas mulleres, Ana Argiz, presidenta, e Gloria González, secretaria, xunto con Antón Valdés como tesoureiro. Xunto a eles tres estarán os vogais “que se encargarán de conseguir os retos marcados pola Asociación”.
A nova asociación nace logo de que en “xuño tanto Portos de Galicia como a empresa madeireira concesionaria botaron ós pescadores do peirao comercial, cando se levaba un ano convivindo sin ningún problema“.
Segundo a nova asociación, esta decisión provocou a masificación do resto das escasas zonas permitidas de pesca. Tamén houbo pescadores que intentaron pescar noutras zonas sen actividade. En ditas zonas a actividade de pesca recreativa non estaba permitida, isto provocou a súa expulsión con advertencia ou sanción por parte da Garda Civil. “Outros pescadores optaron por irse a outros concellos ou mesmo Asturias”.
A Asociación de pesca Recreativa Burela nace coa intención de chegar a acordos coas diferentes partes, apoiados por unha masa social e doutras asociacións, colectivos e a maioría do pobo de Burela. Tamén de impulsar a pesca recreativa responsable e sostible, ensinando valores e dando a coñecer unha afección a cativos e demáis personas interesadas.
Reprentantes da Asociación xa se reuniron co alcalde e a concelleira de Mar, así como cos restantes partidos políticos para conseguir o seu apoio. Tamén se reuniron co capitán da Garda Civil do cuartel de Burela e está prevista unha reunión con Portos.