O IES Perdouro de Burela organiza para o vindeiro xoves unha visita ao patrimonio documental do cemiterio parroquial. A actividade, organizada pola intervención educativa Modelo Burela, será guiada por Pedro Valle, coidador do cemiterio, e contará coa presenza do novo cura párroco, Óscar Santiago, e do marmorista xa xubilado, Óscar Pardiño.
Desde o ano 2004, a intervención educativa Modelo Burela fixo un continuado traballo de campo co obxectivo de localizar os deseños e os epitafios máis significativos, especialmente aqueles que recollen a produción propia dos familiares ou fragmentos de obras clásicas da literatura. Posteriormente, con periodicidade anual, realízase unha visualización destinada a localizar novos materiais de estudo.
Nesta edición de 2022 participará tamén Vanesa Vila Verde, co-autora do audiovisual titulado “Em Companhia da Morte”, gravado en 2011 na Raia Seca, entre Ourense e Portugal. Neste documentario en que participou a actual profesora do IES Perdouro recóllense os testemuños de mulleres que falan sobre a asimilación da morte como algo natural.
Con este acto, o Modelo Burela quere facer un recoñecemento explícito aos traballos de Pedro Valle e de Oscar Pardiño e Laura García Santiso na conservación e renovación do patrimonio funerario dos cemiterios de Burela.
