O alcalde en funcións de Lugo, Rubén Arroxo, xunto coa edil de Participación, Cristina López, e Froilán Pallín e Lucía Anido, en representación de Adega, anunciaron a organización dunha xornada de voluntariado para a recollida de pélets de plástico na costa de Foz.
A intención, dixo Arroxo, é “facilitar que todos os veciños de Lugo que o desexen” poidan colaborar de maneira voluntaria coa limpeza da vertedura de pélets que chega ás costas galegas.
A xornada terá lugar o vindeiro sábado, 20 de xaneiro, no areal de Llas, no municipio de Foz. O Concello de Lugo e Adega habilitarán un bus, que sairá ás 10,00 horas da facultade de Formación do Profesorado, e que chegará ao areal ás 11,30 horas. O final da xornada está previsto para as 14,30 horas, cando regresará o bus a Lugo. As inscricións poderán realizarse a través do formulario habilitado na web e nas redes sociais de Adega.
A actividade conta con 50 prazas para voluntarios, que recibirán formación no protocolo de recollida de pélets, ademais de todo o material necesario para o desenvolvemento da limpeza e para manter a súa seguridade en materia de saúde. Seguindo o principio de precaución, Adega dotará ao voluntariado de luvas homologadas para a manipulación de produtos perigosos.
O protocolo de limpeza do lixo mariño elaborado por Adega inclúe especificacións concretas para a retirada adecuada de pélets de plástico das praias. Algunhas das recomendacións pasan por acudir aos areais en grupos reducidos, realizar a limpeza nas horas de baixamar, empregar luvas de seguridade e evitar achegarse ás zonas ambientalmente máis sensibles.
Aconséllase, igualmente, utilizar a técnica de varrido na area compactada cun cepillo para, posteriormente, metelos nuns recipientes con auga e eliminalos cun colador cunha luz de malla de entre 2 e 3 milómetros. Débese pisar o menos posible a zona a limpar, dirixindo o avance do grupo na mesma dirección. A recollida do material retirado debe facerse en bolsas específicas debidamente etiquetadas, e non mesturar os pellets con outro tipo de residuos.
