O Concello de Foz procedeu á contratación, con cargo ao Plan Único 2021 da Deputación de Lugo, da nova numeración do rueiro do termo municipal. O alcalde, Fran Cajoto, sinalou que, actualmente, a numeración está sobre uns planos do ano 1995 desactualizados, sobre os que se foron anotando a man as novas numeracións. “A perda ou extravío desta documentación constituiría un grave problema para trámites tan habituais como os empadroamentos”, dixo.

Ademais, os planos non son fieis á realidade, xa que na cartografía non se inclúen numerosas vivendas e hai erros de localización, polo que non se pode realizar un “traballo fiable e preciso”. O rexedor municipal engadiu que a creación da nova base de datos, que se fará sobre un sistema de información xeográfica GIS, virá resolver este problema. “É moi habitual que distintas vivendas compartan o mesmo número co engadido dunha letra”, apuntou. Ademais certas direccións non se recoñecen en aplicacións tan empregadas como Google Maps e isto xera problemas cos servizos de correo e paquetería, que non localizan moitas vivendas. “Debemos pór solución a este problema”, asegurou.

NOME DE RÚAS

O alcalde focense comunicou ademais que se aproveitará a ocasión para nomear rúas que están aínda sen nome. “No centro urbano hai varios exemplos, como a rúa que conecta a Avenida Álvaro Cunqueiro e a Rúa do Pilar á altura da Pastelaría Anduriña. Farase unha proposta buscando o maior dos consensos e mellorando desta forma a localización de todos os portais”, dixo.

O traballo non se limita ao centro urbano, senón que se estende a todo o concello. É por iso que o prazo de execución elevouse a oito meses de traballo, para un importe de adxudicación de 17.908 euros.