A conselleira Ethel Vázquez confirmou ao portavoz do PP en Foz, Jaime Castiñeira, o seu compromiso co co impulso á instalación da nova planta depuradora de augas residuais.
“A semana pasada, o PP de Foz mantivo unha reunión coa conselleira de Infraestruturas, Ethel Vázquez, a propósito da construción da nova depuradora de Foz; agradecemos que a Xunta de Galicia siga co compromiso firmado no seu momento co goberno do PP para a nova depuradora de Foz e que estea avanzado”, dixo nun comunicado.
Os populares anuncian que velarán para que o goberno municipal prosiga cos trámites necesarios para a construción da nova depuradora. “Esperamos que o goberno municipal siga adiante e cambie definitivamente a súa opinión inicial, que era contraria a esta ubicación”, indicou Castiñeira.
A nova infraestrutura, dixo, “resolverá un problema medioambiental e de malos olores, que dan unha imaxe moi mala de Foz durante os veráns; é un paso fundamental para corrixir ese gran problema”.
