O Partido Popular de Foz tilda de “moi grave que o alcalde tivese a dimisión do director da Escola de Música catro meses no caixón sen avisar a ninguén”. Así o sinalou o edil popular Juan Rivas logo de asistir  á comisión de seguemento convocada esta semana polo rexedor. “Unha xuntanza que chega moi tarde, pois o socialista é coñecedor da crítica situación pola que atravesa o centro formativo dende principios de ano”, dixo.

Tamén cualifica de “vergoñento” que o rexedor non informara aos grupos políticos da situación. “É unha mala xestión e evidencia unha actitude que vén marcando a Cajoto dende que é alcalde, que é rirse dos problemas e intentar que se solucionen nun caixón debaixo da mesa, conseguindo con elo que acaben agrandándose aínda máis”, dixo.

Neste senso, Juan Rivas considera que este caso “é outro máis” e que se suma, di, “aos dos xubilados ou ao da depuradora”. “Logo as consecuencias sempre son moio peores”, advirte.

Diante esta situación, os populares preguntaron na sesión plenaria por este asunto en cuestión, e fixérono porque “fontes internas” alertáronos de que “o problema pode ser maior e traer máis dimisións”. “A escola está en perigo, ata o di a AMPA e o alcalde non ten a solución; o único que fai é que llas dean os demais”, critica.