A sección segunda da Audiencia Provincial de Lugo condenou a doce anos de cárcere e a dez anos de liberdade vixiada a un home por violar e agredir a unha muller que exercía a prostitución en Foz, segundo informa o Tribunal Superior de Xustiza de Galicia (TSXG). Ademais, impúxolle a prohibición de aproximarse á vítima e de comunicarse con ela durante 18 anos, así como o pago dunha multa de 540 euros e dunha indemnización de 15.000 euros.

O tribunal, que tivo en conta a atenuante de embriaguez, considerouno autor dun delito de violación, consistente en agresión de carácter sexual con acceso vaginal, anal e bucal, imposta sen o seu consentimento, empregando violencia con carácter particularmente degradante ou vexatorio, e doutro delito leve de lesións.

Os maxistrados consideran probado que o acusado se desprazou á vivenda da vítima, con quen acordara previamente un servizo sexual. Unha vez alí, segundo consta na sentenza, mantivo “un comportamento brusco e violento, tratándoa de forma desconsiderada, coma se puidese facer o que quixese con ela polo feito de exercer a prostitución”, polo cal a afectada pediulle en diversas ocasións que se fora.

“O acusado non só non se foi, senón que lle pegou de forma reiterada e obrigouna a continuar cos actos sexuais en contra da súa vontade expresa”, subliñan os xuíces na resolución, na que destacan que o testemuño da vítima foi “persistente no tempo e consustancialmente idéntico ao longo das súas intervencións”.

Ademais, inciden en que carece de incredibilidad obxectiva, pois aseguran que consta de corroboracións periféricas, entre as que destacan “as numerosísimas lesións que sufriu” a afectada.