O proxecto da Comisión Europea (CE) “As Prazas de Europa” chega a Foz este vindeiro xoves día sete. Será na praza do Conde de Fontao de 18:30 a 21:00. O obxectivo é que a cidadanía poida dialogar coas persoas que intervirán no acto convertendo a praza nun gran punto de encontro, tal como sinala a propia CE. Os e as relatoras serán representantes da Comisión, do Concello de Foz, da Xunta de Galicia, da Axencia de Control da Pesca e do Centro de Información Europea, Europe Direct, Lugo.

“As Prazas de Europa” busca poñer en valor a importancia de vilas e localidades de menor tamaño para a promoción dos principais valores europeos: democracia, solidariedade e paz. “Uns principios que son hoxe máis importantes que nunca”.

A CE quere coñecer ata que punto o medio rural europeo e os municipios pequenos son indispensables para o mañá de Europa. Por iso, chega á Praza do Conde de Fontao, fronte ao Porto da Vila focense para abordar unha serie de puntos.

O primeiro, dar a coñecer de primeira man as políticas europeas de medioambiente e consumo sostible. Segundo, poñer en valor produtos locais e o papel dos estándares da UE como impulso á calidade do produto e á internacionalización, así como unha garantía de calidade para os consumidores. E por último, explicar como traballa a Comisión Europea para mellorar a vida dos cidadáns de vilas, cidades pequenas e zonas rurais.

No encontro participarán Fran Cajoto, alcalde de Foz, Maciej Berestecki, agregado de prensa da Representación da Comisión Europea en España, Patricia Sánchez, responsable de Comunicación e Políticas da Axencia Europea de Control da Pesca, Olga Iglesias Fontal, xefa territorial de Medio Rural da Xunta de Galicia en Lugo e Mario Prado, Técnico de Comunicación de Europe Direct Lugo.

A cita está organizada pola Representación da Comisión Europea en España e o Concello de Foz, coa colaboración do Centro de Información Europea Europe Direct Lugo.

Ao final do evento, haberá un Euroaperitivo no que os asistentes poderán gozar dun cátering de produtos alimentarios sostibles galegos, con certificación europea e que recibiron financiamento comunitario, á vez que dialogan con expertos que lles explicarán as características destes produtos.