InicioCentralFozO alcalde de Foz supervisa as obras no estacionamento do cemiterio municipal...

O alcalde de Foz supervisa as obras no estacionamento do cemiterio municipal feitas con apoio da Deputación

Ademais, Fran Cajoto, fai un balance moi positivo das Festas do Carme da vila, que define como “as máis tradicionais e sentidas, nun ano que está a ser realmente espectacular”.

Publicada o

- Advertisement -

O alcalde focego, Fran Cajoto, supervisou as obras de acondicionamento do estacionamento do cemiterio municipal de Foz, encargadas pola Deputación de Lugo a Tragsa xunto ás obras de perfilado e extensión de zahorra no estacionamento do colexio Fondo Nois por 37.000 euros.

Fran Cajoto agradece á Deputación “a colaboración fluída que existe co Concello de Foz. Queriamos completar o gran investimento que estamos a facer na urbanización completa de Costa de Castro froito do convenio que asinamos no seu día. Buscamos financiamento para o arranxo e pavimentación do estacionamento en Costa do Castro e xurdiu esta posibilidade, que se completou co arranxo do aparcamento en Fondo Nois”.

O rexedor municipal engade que “son obras moi necesarias, que se están a facer a pesar do intento de parálise que fixo o voceiro popular local, denunciando na xustiza a encarga que fixo a Deputación de Lugo a Tragsa. Seguimos avanzando”.

BALANCE MOI POSITIVO DAS FESTAS DO CARME

Ademais, Fran Cajoto, fai un balance moi positivo das Festas do Carme da vila, que define como “as máis tradicionais e sentidas, nun ano que está a ser realmente espectacular”.

O rexedor municipal destaca que “o verán en Foz está a ser xa un auténtico éxito, estamos rachando cifras de ocupación e de afluencia de visitantes. Moitas persoas que son asiduas da vila trasládannos o atractivo de Foz e saben o esforzo que estamos a facer, aínda que non é suficiente”.

A concelleira de Cultura, Inés López Couto, destaca a recuperación da normalidade da programación, aínda que con cambios que chegaron para quedarse: “A misa solemne é o segundo ano que se oficia ao aire libre, en Conde de Fontao, e coido que, por imperativo popular, vai ser a norma. As rúas engalanáronse coma nunca, houbo moito público nos distintos concertos e en todas as verbenas. Hai moitas gañas de saír e relacionarse. Todo saíu moi ben, aínda que sempre anotamos pequenas cousas para corrixir en próximas edicións. Quédome coa gran satisfacción de ver á xente desfrutar”.

O alcalde agradece a todos os que fixeron posible co seu traballo esta gran celebración: a asociación O Noso Foz, persoal municipal e externo de montaxe, limpeza viaria e recollida de lixo, Garda Civil, Policía Local, Protección Civil, persoal técnico de toda índole, músicos, asociacións folclóricas e un largo etcétera. Sen esquecernos da Confraría da Virxe do Carme e de todas as veciñas e veciños que estiveron moitas semanas deseñando, preparando os materiais e confeccionando unhas alfombras que engalanaron coma nunca o noso pobo e que son un auténtico aceno de identidade de Foz. Como traballan todos xuntos os veciños da vila para adornala é digno de ver, de contar e de agradecer”.

ÚLTIMAS

Erika Gomes Mendes: “Fixen un traballo para saber se os caboverdianos coñecían algo de Galicia antes de vir”

-Erika, cando chegaches a Burela desde o teu país? Cheguei a Burela en 2017 e...

‘A Sacabeira’ celebrará o Día de Rosalía o 25 de febreiro en Sargadelos

O vindeiro 25 de febreiro, no Café Bar Cultural A Sacabeira, a ACR Fervenza  de Sargadelos celebra...

Denuncian que o Hospital de Burela queda só cun cardiólogo

A CIG-Saúde da Mariña denuncia que o hospital queda cun só especialista en cardioloxía...

Trabada solicita unha subvención para as cubertas do CEIP Celso Currás

O Concello de Trabada solicitou unha subvención á Xunta de Galicia para a mellora...