O alcalde de Foz, Francisco Cajoto, apremou este martes á Xunta de Galicia pola nova depuradora, que acumula “cinco anos de atraso” porque foi un compromiso plasmado polo Goberno galego a través dun convenio en 2016 e que tiña como data tope o 2021 para que estivese operativa.
Cajoto puxo de relevo que se trata de “un problema estrutural” do municipio. “A depuradora non ten a capacidade suficiente e especialmente cando aumentamos a poboación como no verán, en que se triplica, ou cando hai episodios de choivas fortes, a depuradora actual non admite tanto caudal”, aseverou.
Neste contexto, reivindicou “unha depuradora nova”, deixando caer que “por iso se asinou un convenio no 2016 coa Xunta e Augas de Galicia, un convenio que marcaba que debía estar concluída en 2021″. No entanto, o rexedor denunciou que a Administración autonómica “foi dilatando os prazos e aínda a día de hoxe non se iniciou a construción”, tendo en conta que o Concello “fixo todos os trámites para a adquisición de terreos”.
“O ano que vén poderían empezar as obras, financiadas nun 80 por cento por fondos da Unión Europea”, agregou Cajoto. A necesidade desta infraestrutura, segundo o alcalde de Foz, fíxose “evidente o pasado fin de semana, con episodios puntuais de verteduras”. E é que, tal e como reiterou, as instalacións actuais están deseñadas “para 5.000 habitantes”. “O que tentamos é urxir á Xunta de Galicia”, sinalou, incidindo en que unha depuradora nova “é máis que necesaria” para o concello: “Levamos cinco anos de atraso e son demasiados”.
