O portavoz local do PP de Foz, Javier Castiñeira, sinala “a falta de dilixencia dos servizos municipais” como o de Urbanismo e acusan directamente ao alcalde, Fran Cajoto, de “ter montado un enredo coas licenzas municipais”. Por este motivo “o PP recibe queixas de moitísimos veciños”, asegura Castiñeira.
Segundo o voceiro local do PP “algúns solicitantes levan meses esperando pola licenza de obras” por culpa “deste equipo de goberno que é moi pouco executivo”. Ademais disto, o goberno municipal non aproveita “as sinerxías coa Deputación” e o seu servizo de Cooperación Local. Sobre este punto, Castiñeira responsabiliza ao presidente da Deputación de Lugo, José Tomé, da falta de persoal para atender este departamento.
O PP de Foz tamén sinala a falta de dilixencia en Axuda no Fogar e co contrato da “depuración e saneamento que leva todo o mandato caducado”. Deste xeito, Castiñeira cualifica ao goberno municipal de estar “en prácticas e ser pouco dilixente”.
